趣談有機菜

　

其一﹕

唔講都唔知﹐原來香港有機菜落實咗一國兩制。早輪入到超市買嘢﹐發覺有好多有機菜。有本地﹐又有外國嘅。攞起一包睇睇﹐覺得奇怪﹐點解有機菜三個字大大隻旁邊﹐又會有非常細小嘅字寫住“轉型期"﹐唔留意都唔覺眼﹐真喺唔明解。

第二日﹐打電話去問有關部門﹐了解啲包裝為何要印住“轉型期"三個字。嗰職員好有禮貌咁回答﹐轉型期就是塊田本身唔喺種開有機菜﹐而家改種有機菜﹐但喺農地本身仍殘留大量農藥﹐化肥﹐金屬等物質﹐所以呢段過渡期叫做轉型期﹐為期一年。過咗呢段轉型期﹐先至真喺有機菜。聽完之後﹐覺得冇乜問題。

再過兩日﹐同菜種舖個老板講開。佢話依家香港種菜啲人小咗好多﹐因為食環署拉得嚴﹐想擺街邊賣都唔得﹐揾唔到食﹐所以新界啲人都費事種出來賣。依家多數都喺買種返大陸種﹐再運返香港賣。如果講有機菜﹐大陸規定轉型期喺三年。聽完感覺好奇怪﹐點解香港可以咁先進﹐一年就可以將殘留農藥同化肥清除﹐而大陸就要三年。落實一國兩制﹐真喺由食菜開始。

　

其二﹕

某日到一個大型農場觀光﹐該農場種咗好多有機菜﹐負責介紹嘅人員講解﹐種菜要種得好﹐有幾個必要條件﹐要注意陽光﹑肥料同改良土質等等。

行行重行行﹐去到肥料間﹐有同行者見到有啲肥料喺用骨頭磨成粉做嘅。於是問負責人員﹐點解啲肥料喺用骨頭造嘅﹖工作人員回答得幾妙﹐佢話佢地啲專家話嗰啲動物都喺食植物嘅﹐所以冇問題。聽完之後﹐都喺一頭霧水﹐啲專家真喺好玄妙。

　

其三﹕

某日﹐有人問點解啲有機菜賣得咁貴﹐喺大陸買菜都喺一個幾毫一斤﹐而香港啲有機菜賣貴十幾二十倍。

有朋友代答﹐貴喺有原因嘅。如果你塊田喺種有機菜﹐而你隔離周圍啲田都唔喺種有機菜嘅﹐佢地用化學農藥﹐藥力咁猛﹐會將啲蟲趕晒落你塊田度﹐因為你唔用化學農藥﹐你塊田啲收成就好難有保證。所以成本當然高好多﹐一百棵都揀唔到十棵見得人嘅出來賣﹐賣貴多十幾二十倍都可能歸唔到本。要種百分之百有機菜﹐難度喺非常之高嘅﹐技術同設備都要好先進﹐好似外國咁﹐環保又要做得好﹐政府監察做得嚴﹐標準又高﹐又唔准有基因改造成份﹐咁多限制。用晒玻璃屋﹐電腦監察﹐機械人收割﹐咁就差唔多喇。

　

其四﹕

在香港素食者經常被人問埋啲極端嘅問題。有一位朋友被人問﹐你食菜都唔喺齋﹐因為喺鄉下種菜﹐都喺用人糞尿造肥田料﹐啲人都唔喺食齋嘅﹐所以啲菜都唔喺齋。遇到呢啲咁嘅極端問題﹐唯有請教長者﹐長者說﹐遇到極端問題﹐就要用極端答案回答。可以反問他﹐你是食菜﹐還是食淋菜嗰啲嘢﹖如果佢發難渣﹐大家就唔駛講落去。如果佢態度軟化﹐聽得落道理﹐可以同佢講﹐我地喺食菜﹐唔喺食上面啲肥料﹐養分已經間接經大自然轉化。所以啲菜喺齋﹐喺毫無疑問嘅﹐你大可放心。